Para kay Aileen*
May ngiti sa mukha ng isang kamag-aral
Sa bawat pagtatagpo ay pagbati
sa mga di pangkaraniwang-araw sa pamantasan.
May ngiti sa mukha ng isang retratista
Sa bawat pitik at sipat sa kamera
ng mga makabuluhang kwento at kaganapan.
May ngiti sa mukha ng isang mang-aawit
Sa bawat titik ay himig na mailalapat
sa mga gabi ng pagtitipon at pagtatanghal
May ngiti sa mukha ng isang kasama
sa bawat sigaw at daing ay tugon
sa tanggulan ng ating karapatan,
sa mga araw ng ating martsa sa lansangan,
maging sa kanayunan
At sa muling pagtatagpo
sa dulo ng daang tinatalunton
para sa pagkakapantay-pantay at kalayaan,
para sa makatwiran at makatarungan,
may ngiti sa iyong mukha.
May ngiti sa mukha ng isang mandirigma.
*Para sa bawat ngiting ibinabati mo sa akin sa mga pagkakataong muli tayong nagtatagpo bagamat di nakakapagkamustahan.
Filed under: Uncategorized | Leave a Comment
-
Pansamantala itong magiging palaruan, parausan at palikuran ng mga pagninilay-nilay, karanasan, pakikipagsapalaran, kuro-kuro, opinyon, angas, payo, obserbasyon, propaganda, kontra-propaganda, kalandian, katha, pangdudusta, pagpupuri, kabaklaan, katomboyan, kahayupan, at kung anu-ano pang praktika ng hibang na kaisipan. Sa huli, sa rebolusyon din ang aking uwi.
No Responses Yet to “Para kay Aileen*”