Pangkaraniwang Pormula sa Potensyal na Pagpapatalsik ng Pangulo*
Dagdagan ang mga kamag-anak at negosyante sa gabinete
Bawasan ang oposisyon at kritiko sa batasan at sa simbahan
Dagdagan ang panghimod-tumbong na bayad-utang kay Uncle Sam
Bawasan ang pagkain sa hapag-kainan ng mag-anak ni Maria at Juan
Dagdagan ang suhol ni Peping sa mga abugado’t mahistrado
Bawasan ang ekta-ektaryang lupang maaari na sanang bungkalin ni Lito
Dagdagan ang pasahe sa lahat ng pwedeng sakyan at daanan
Bawasan ang pag-asa ni Jose na may matira pa sa kakaramput na sweldo
Dagdagan ang nagtatayugang gusali at mall ni Jaime Augusto
Bawasan ang mga kabahayang nagsisiksikan tulad ng kay Pedro
Dagdagan ng pabigat pang taon si Pepe sa pampublikong eskwelahan
Bawasan ang pondo hanggang mabulok ang mga silya, libro at pisara
Dagdagan ang pambili ng mga granada,mga bala at machine gun
Bawasan ang bilang ng mga palaban at aktibistang huhusgahang komunista
Dagdagan ang laway sa bibig sa pagkatuta sa makauring patakaran at panukala
Bawasan ng isang taingang pandinig sa panawagan nina Juan at ng iba pa
Dagdagan pa ng mga dahilan upang maghimutok at mag-alsa ang taumbayan
Bawasan ang taong itatagal pa ng pangulong taning ay nakatakda na.
*Kabilang sa Project Tulagalag 100 ng Kilometer 64 Poetry Group.
Filed under: Uncategorized | Leave a Comment
-
Pansamantala itong magiging palaruan, parausan at palikuran ng mga pagninilay-nilay, karanasan, pakikipagsapalaran, kuro-kuro, opinyon, angas, payo, obserbasyon, propaganda, kontra-propaganda, kalandian, katha, pangdudusta, pagpupuri, kabaklaan, katomboyan, kahayupan, at kung anu-ano pang praktika ng hibang na kaisipan. Sa huli, sa rebolusyon din ang aking uwi.
No Responses Yet to “Pangkaraniwang Pormula sa Potensyal na Pagpapatalsik ng Pangulo*”