Kinaumagahan
29Oct10
Ngayong gabi’y
Higit na hitik sa mga tala
ang mga salita at mga tugma
Bumubuo ng mga himig
Habang ang taliba’y magdamag
nakaabang sa anumang banta
At bukas sa pagbangon ng kabundukan,
sa pag-uunat ng mga sanga
ay bulaklak na bumubuka
Ang tugma’y magkokorteng punglo
na anumang oras ay handang umasinta
sa mga pasistang halimaw na nakawala
Ang salita’y maghahawan ng daan
patungo sa magsasakang nasa dampa
na handang tanggapin ang armadong bisita
Ang himig ay magkakatawang propaganda
at ang taliba ngayo’y isang makatang gerilya
na siyang yayakaging lumahok at kumilos ang masa
Ngayong umaga’y
Higit na mainit sa sikat ng araw
ang diwa ng puspusang pakikibaka
Filed under: Uncategorized | Leave a Comment
-
Pansamantala itong magiging palaruan, parausan at palikuran ng mga pagninilay-nilay, karanasan, pakikipagsapalaran, kuro-kuro, opinyon, angas, payo, obserbasyon, propaganda, kontra-propaganda, kalandian, katha, pangdudusta, pagpupuri, kabaklaan, katomboyan, kahayupan, at kung anu-ano pang praktika ng hibang na kaisipan. Sa huli, sa rebolusyon din ang aking uwi.
No Responses Yet to “Kinaumagahan”